मुसळधार पावसाचा इशारा, शाळांना सुट्टी जाहीर!

• अतिवृष्टीच्या इशाऱ्यामुळे पालघरमधील शाळा आणि महाविद्यालयांना सुट्टी जाहीर.
• पालघर, डहाणू आणि तलासरी तालुक्यातील सर्व शैक्षणिक संस्थांना सुट्टी असेल.
• विद्यार्थ्यांना सुट्टी असली तरी शिक्षक आणि कर्मचाऱ्यांना उपस्थित राहणे अनिवार्य आहे.

School Colleges Holiday Declared on Friday, 24 July: भारतीय हवामान खात्याने (IMD) दिलेल्या अतिवृष्टीच्या इशाऱ्याच्या पार्श्वभूमीवर, खबरदारीचा उपाय म्हणून

पालघर जिल्ह्यातील पालघर, डहाणू आणि तलासरी या तीन तालुक्यांतील सर्व शाळा आणि महाविद्यालयांना शुक्रवारी (24 जुलै 2026) रोजी अधिकृत सुट्टी जाहीर करण्यात आली आहे. पालघरच्या जिल्हाधिकारी तथा जिल्हा आपत्ती व्यवस्थापन प्राधिकरणाच्या अध्यक्ष डॉ. इंदु राणी जाखड यांनी यासंदर्भातील शासकीय आदेश जारी केले आहेत.

हवामान खात्याचा इशारा आणि परिस्थिती

हवामान विभागाने दिलेल्या पूर्वसूचनेनुसार, गुरुवारी (23 जुलै 2026) पालघर जिल्ह्यासाठी अतिवृष्टीचा (Red Alert) इशारा देण्यात आला होता. तर शुक्रवारी (24 जुलै 2026) जिल्ह्यासाठी 'ऑरेंज अलर्ट' देण्यात आला आहे. सध्या जिल्ह्यात ठिकठिकाणी मुसळधार ते अतिमुसळधार पाऊस सुरू असून काही ठिकाणी अत्यंत मुसळधार पावसाची शक्यता वर्तवण्यात आली आहे. पावसामुळे निर्माण झालेली स्थानिक परिस्थिती आणि विद्यार्थ्यांची सुरक्षितता लक्षात घेऊन हा निर्णय घेण्यात आला आहे.

कोणत्या संस्थांना लागू असेल सुट्टी?

आपत्ती व्यवस्थापन अधिनियम 2005 मधील कलम 25 आणि शालेय शिक्षण व क्रीडा विभागाच्या 02 ऑगस्ट 2019 च्या शासन परिपत्रकानुसार प्राप्त अधिकारांचा वापर करून जिल्हाधिकाऱ्यांनी हा निर्णय घेतला आहे. या आदेशानुसार खालील सर्व शैक्षणिक संस्थांना 24 जुलै रोजी सुट्टी असेल.

• अंगणवाड्या
• सरकारी, जिल्हा परिषद आणि नगरपालिका शाळा
• खाजगी, अनुदानित व विनाअनुदानित प्राथमिक आणि माध्यमिक शाळा
• सर्व आश्रमशाळा
• सर्व महाविद्यालये
• आयुक्त व्यवसाय व प्रशिक्षण केंद्राच्या आस्थापनेवरील शैक्षणिक संस्था

पालघर जिल्ह्यातील पालघर, डहाणू आणि तलासरी तालुक्यातील सर्व माध्यमाच्या शाळा व महाविद्यालये यांना शुक्रवार दि. २4.०७.२०२६ रोजी सुट्टी जाहीर pic.twitter.com/ugo0HrS62C

— DISTRICT INFORMATION OFFICE, PALGHAR (@InfoPalghar) July 23, 2026

शिक्षक व कर्मचाऱ्यांना उपस्थिती अनिवार्य

विद्यार्थ्यांना सुरक्षेच्या कारणास्तव सुट्टी देण्यात आली असली, तरी शाळा-महाविद्यालयांचे सर्व मुख्याध्यापक, शिक्षक आणि शिक्षकेतर कर्मचाऱ्यांना पूर्ण कार्यालयीन वेळेत उपस्थित राहण्याचे निर्देश देण्यात आले आहेत. आपत्कालीन परिस्थितीत स्थानिक प्रशासनाच्या आदेशानुसार आपत्ती व्यवस्थापनाचे कामकाज करणे या कर्मचाऱ्यांसाठी बंधनकारक असणार आहे.

नागरिकांनी तसेच पालकांनी पावसाच्या तीव्रतेचा अंदाज घेऊन योग्य ती खबरदारी बाळगावी आणि प्रशासनाने दिलेल्या सूचनांचे पालन करावे, असे आवाहनही जिल्हा प्रशासनाकडून करण्यात आले आहे.

24 जुलैचा हवामान अंदाज

हवामान विभागाने वर्तवलेल्या ताज्या अंदाजानुसार, शुक्रवारी (24 जुलै) उत्तर मध्य महाराष्ट्रातील घाट परिसरात काही ठिकाणी विजांच्या कडकडाटासह मेघगर्जना आणि अतिवृष्टीची दाट शक्यता आहे. उत्तर कोकणात काही ठिकाणी मुसळधार ते अति मुसळधार पाऊस आणि तुरळक ठिकाणी अतिवृष्टीची दाट शक्यता आहे. दक्षिण कोकण, गोवा आणि दक्षिण मध्य महाराष्ट्रातील घाट परिसरात तुरळक ठिकाणी मुसळधार ते अति मुसळधार पावसाची दाट शक्यता आहे.

24 जुलै रोजी कोणत्या भागात कोणता अलर्ट?

रेड अलर्ट
पुणे घाट परिसर

ऑरेंज अलर्ट
पालघर, ठाणे, रायगड, नाशिक घाट परिसर, सातारा घाट परिसर

यलो अलर्ट
मुंबई, रत्नागिरी, सिंधुदुर्ग, नंदुरबार, नाशिक, कोल्हापूर घाट परिसर, अकोला, अमरावती, बुलढाणा, वाशिम, यवतमाळ