डेव्हिड वॉर्नर: सँडपेपर ते ड्रिंक अँड ड्राईव्ह
ऑस्ट्रेलियन सलामीवीर डेव्हिड वॉर्नरची कारकीर्द जितकी यशस्वी आहे, तितकीच ती वादांनी भरलेली आहे. २०१۸ मध्ये दक्षिण आफ्रिकेविरुद्धच्या 'सँडपेपर गेट' प्रकरणामुळे वॉर्नरच्या प्रतिमेला मोठा धक्का बसला. चेंडूशी
छेडछाड केल्याच्या या प्रकरणात त्याला मुख्य सूत्रधार मानले गेले आणि क्रिकेट ऑस्ट्रेलियाने त्याच्यावर एका वर्षाची बंदी घातली होती. याशिवाय, मैदानावर प्रतिस्पर्धी खेळाडूंशी सतत वाद घालण्यामुळेही तो नेहमी चर्चेत असतो. अगदी अलीकडे, जुलै २०२६ मध्ये, मद्यपान करून गाडी चालवल्याचा गुन्हा देखील त्याने कबूल केला, ज्यामुळे त्याच्या वादग्रस्त कारकिर्दीत आणखी एका प्रकरणाची भर पडली आहे.
बेन स्टोक्स: मैदानाचा हिरो, मैदानाबाहेर वाद
इंग्लंडचा अष्टपैलू खेळाडू बेन स्टोक्स हा आधुनिक क्रिकेटमधील मॅचविनर म्हणून ओळखला जातो, पण २०१७ मधील ब्रिस्टल नाईट क्लब बाहेरील मारामारीच्या घटनेमुळे तो प्रचंड वादात सापडला होता. या प्रकरणामुळे त्याला अटक झाली आणि त्याच्यावर खटलाही चालवण्यात आला, ज्यामुळे त्याला इंग्लंड संघातील उपकर्णधारपद आणि ॲशेस दौऱ्याला मुकावे लागले. नंतर न्यायालयातून त्याची निर्दोष मुक्तता झाली असली तरी, या घटनेमुळे त्याच्या कारकिर्दीवर एक काळा डाग लागला. क्रिकेट बोर्डानेही त्याच्यावर बंदी आणि दंड ठोठावला होता. या वादानंतर त्याने २०१९ च्या विश्वचषकात इंग्लंडला एकहाती विजय मिळवून देत शानदार पुनरागमन केले.
अँड्र्यू सायमंड्स: 'मंकीगेट' आणि बेशिस्त वर्तन
ऑस्ट्रेलियाचा दिवंगत अष्टपैलू खेळाडू अँड्र्यू सायमंड्स त्याच्या स्फोटक फलंदाजीइतकाच वादग्रस्त स्वभावासाठी ओळखला जात असे. २००८ साली भारताविरुद्धच्या सिडनी कसोटीतील 'मंकीगेट' प्रकरण हे त्याच्या कारकिर्दीतील सर्वात मोठे वादळ ठरले. त्याने हरभजन सिंगवर वर्णद्वेषी टिप्पणी केल्याचा आरोप केला होता, ज्यामुळे दोन्ही देशांच्या क्रिकेट बोर्डांमध्ये तणाव निर्माण झाला होता. याशिवाय, दारूच्या व्यसनामुळे संघाच्या बैठकांना गैरहजर राहणे किंवा सामन्यासाठी नशेत पोहोचणे अशा बेशिस्त वर्तनामुळे क्रिकेट ऑस्ट्रेलियाने त्याचा करार रद्द केला, ज्यामुळे त्याची आंतरराष्ट्रीय कारकीर्द अकाली संपुष्टात आली.
हरभजन सिंग: 'मंकीगेट' आणि 'स्लॅपगेट'
भारताचा 'टर्बनेटर' म्हणून ओळखला जाणारा हरभजन सिंग त्याच्या फिरकीइतकाच मैदानावरच्या आक्रमक स्वभावासाठी ओळखला जातो. अँड्र्यू सायमंड्ससोबतच्या 'मंकीगेट' प्रकरणात तो केंद्रस्थानी होता. मात्र, त्याच्या कारकिर्दीतील सर्वात वादग्रस्त क्षण ठरला तो म्हणजे आयपीएल २००८ मधील 'स्लॅपगेट' प्रकरण. किंग्ज इलेव्हन पंजाबकडून खेळताना मुंबई इंडियन्सविरुद्धच्या सामन्यानंतर त्याने एस. श्रीशांतच्या कानशिलात लगावली होती. या घटनेमुळे त्याला त्या आयपीएल हंगामातून बॅन करण्यात आले होते. आजही, इतक्या वर्षांनंतर, या दोन खेळाडूंमधील वाद आणि एकमेकांना दिलेली आव्हाने चर्चेत असतात.
एस. श्रीशांत: 'स्लॅपगेट' ते स्पॉट फिक्सिंग
भारताचा वेगवान गोलंदाज एस. श्रीशांतची कारकीर्द प्रतिभेपेक्षा वादांमुळेच जास्त गाजली. आयपीएल २००८ मध्ये हरभजन सिंगने कानशिलात लगावल्यानंतर मैदानावर रडणारा श्रीशांत सर्वांच्या लक्षात आहे. पण त्याच्या कारकिर्दीला सर्वात मोठा धक्का बसला तो २०१३ च्या आयपीएलमधील स्पॉट-फिक्सिंग प्रकरणामुळे. दिल्ली पोलिसांनी त्याला स्पॉट-फिक्सिंगच्या आरोपाखाली अटक केली आणि बीसीसीआयने त्याच्यावर आजीवन बंदी घातली, जी नंतर कमी करून सात वर्षांची करण्यात आली. या प्रकरणामुळे त्याचे आंतरराष्ट्रीय क्रिकेट खेळण्याचे स्वप्न भंगले आणि एक प्रतिभावान गोलंदाज वादाच्या भोवऱ्यात कायमचा हरवला.
शोएब अख्तर: 'रावळपिंडी एक्सप्रेस' आणि वाद
जगातील सर्वात वेगवान गोलंदाज म्हणून ओळखला जाणारा पाकिस्तानचा शोएब अख्तर नेहमीच वादांच्या केंद्रस्थानी राहिला. चेंडूशी छेडछाड करणे, सहकारी खेळाडूंशी भांडणे, डोपिंग टेस्टमध्ये दोषी आढळणे आणि पाकिस्तान क्रिकेट बोर्डाशी सततचे मतभेद यांमुळे त्याची कारकीर्द नेहमीच वादग्रस्त ठरली. निवृत्तीनंतरही, तो त्याच्या परखड वक्तव्यांमुळे आणि विविध आरोपांमुळे चर्चेत असतो. काही वर्षांपूर्वी एका टीव्ही शोमध्ये अँकरसोबत झालेल्या वादामुळे त्याला थेट प्रक्षेपण सोडून जावे लागले होते, जे प्रकरण खूप गाजले.
